Çfarë është PAI-ja?

Plani Arsimor Individual

Çfarë është PAI?

 

Plani Arsimor Individual (PAI) është një dokument i veçantë që planifikon mbështetjen shtesë në procesin edukativo-arsimor të nxënësve të cilët, pavarësisht nga diferencimi i mësimit, nuk mund të përfshihen dhe të përparojnë në të mësuar. Këta nxënës kanë nevojë për ndërhyrje më intensive, përkatësisht përpilimin e një instrumenti të veçantë – Plani Arsimor Individual (PAI) i cili është në përputhje me aftësitë funksionale të nxënësit. Qëllimi i zbatimit të Planit Arsimor Individual është arritja e përfshirjes optimale të fëmijës / nxënësit në aktivitetet e rregullta mësimore, si dhe pranimi dhe pavarësia e tij në grupin e bashkëmoshatarëve

Çfarë përmban Plani Arsimor Individual?

PAI është një dokument i cili përmban më tepër pjesë.

1. Informatat bazë për nxënësin – kjo pjesë i përmban të dhënat personale për nxënësin dhe informatat e tjera të nevojshme si: historia e arsimit; të dhënat për ndërhyrjet e mëparshme; historia mjekësore (nëse ka), përshkrimi i nivelit aktual të funksionimit të nxënësit / statusit të zhvillimit në tërësi, dhe pastaj sipas fushave (statusi zhvillimor-kognitiv, emocional, fizik dhe social), si dhe karakteristikat individuale të fëmijës (preferencat, aftësitë, nevojat, interesat, etj).
2. Niveli aktual i arritjeve në fusha të ndryshme – kjo pjesë përfshin një listë të të gjitha lëndëve për të cilat nxënësi ka nevojë për mbështetje, nivelin aktual të arritjeve të nxënësit për secilën lëndë për të cilën ka nevojë për mbështetje, pikat e forta dhe nevojat që i referohen mësimit të nxënësit dhe të dhënave të përshtatshme të vlerësimit, si dëshmi e vendimit që nxënësi ka nevojë për mbështetje.
3. Identifikimi i nevojave prioritare – pasi EISH-ja të ketë dokumentuar profilin dhe arritjet e nxënësit (pikat 1 dhe 2), këto informata mund të përdoren për t’i identifikuar fushat në të cilat nxënësi ka nevojë për mbështetje dhe për t’i caktuar prioritetet. Këto fusha prioritare duhet të grupohen në fusha të ndryshme funksionale, me ç’rast detyrimisht merren parasysh qëllimet e rekomanduara të zhvillimit dhe ndërhyrjet e trupave profesionalë për vlerësimin funksional.Në identifikimin e nevojave prioritare, duhet të merren parasysh mundësitë dhe funksionet momentale të fëmijës, si dhe kompetencat dhe nevojat e fituara për secilën fushë që ka nevojë për mbështetje. Në bazë të identifikimit të nevojave prioritare të nxënësit, janë planifikuar rezultatet e të mësuarit, të cilat duhet të jenë specifike, të matshme dhe të arritshme.
4. Identifikimi i strategjive mësimore dhe strategjive të vlerësimit – kjo pjesë i përshkruan mënyrat e punës me nxënësin, përshkrimin e metodave, teknikave dhe aktiviteteve specifike në zhvillimin e mësimit dhe vlerësimit, rezultatet që pritet të arrihen nga nxënësi, mjetet / resurset mësimore të cilat do të jenë të nevojshme për të zbatuar PAI-në, si dhe rolet dhe përgjegjësitë e faktorëve të ndryshëm.
5. Korniza kohore për zbatim – i referohet periudhës kohore të fillimit të zbatimit të PAI-së, periudhës së zbatimit dhe periudhës kohore të analizës së përparimit të nxënësit.
6. Raporti i përparimit – është pjesë përbërëse e Planit Arsimor Individual për vlerësimin e vazhdueshëm dhe mbledhjen e të dhënave që do të përdoren për të përcaktuar përparimin e nxënësit. Raporti i regjistron rezultatet e arritura nga të mësuarit, mënyrën në të cilën do të raportohen arritjet e nxënësit, përcaktimin e periudhës kohore në të cilën do të përpilohet raporti dhe frekuencën e njoftimit.
7. Emrat dhe pozicionet e anëtarëve të ekipit për përpilimin dhe zbatimin e PAI-së.
8. Ndjekja, evalvimi dhe revidimi i PAI-së.